D&L

Elke groot liefdesverhaal begin mos êrens. Ons s’n het begin met iets heel onverwags ... ’n koer. Lizanne het eintlik per ongeluk vir DJ gekoer. Toe sy besef hoe oud hy is, was haar eerste reaksie: "Jy is definitief bietjie te jonk vir my!" Gelukkig vir DJ het hy nie dieselfde gevoel gedeel nie. Hy het eenvoudig besluit dat ouderdom net ’n getal is en aangehou gesels asof hy reeds besig was om haar hart te wen. Na heelwat geselsies het Lizanne uiteindelik moed bymekaar geskraap en gevra: "Gaan jy my ooit op ’n date vra?" DJ het dit nie as ’n voorstel gesien nie, maar meer as 'n uitdaging. Daardie Vrydag het hy vanaf Malelane na Ermelo gery, gereed vir die groot afspraak die volgende dag. Teen Saterdag het Lizanne egter effens koue voete gekry en voorgestel dat hulle dalk die afspraak uitstel as hy nie slaapplek kon kry nie. Maar DJ was nie van plan om maande se geselsies deur iets so klein te laat ontspoor nie. En so het hy die Saterdag vanaf Ermelo al die pad Pretoria toe gery — net vir ’n eerste afspraak. Gelukkig was die kilometers die moeite werd. Wat veronderstel was om net ’n eerste afspraak te wees, het vinnig gevoel soos twee mense wat mekaar al jare ken. Die gesprekke het maklik gevloei, die lag was opreg en die tyd het eenvoudig te vinnig verbygegaan. Toe die tyd aanbreek om huis toe te gaan, was die totsiens heelwat moeiliker as wat enige van ons verwag het. Wat begin het met ’n toevallige koer, het verander in eindelose gesprekke, lang ritte, baie lag, ’n liefde wat elke kilometer oorbrug het en twee harte wat mekaar gevind het toe hulle dit die minste verwag het. En vandag kan ons met sekerheid sê: Die beste besluit wat Lizanne ooit per ongeluk gemaak het, was daardie koer. 🤍💍✨